SESORAH

MATERI POKOK : SESORAH

• Pangerten :

Sesorah yaiku salah satunggaling kaprigelan micara ing sangarepe wong akeh kanggo ngandharake pemanggih utawi ide.

• Bab-Bab kang Perlu Digatekake Nalika Sesorah :

1.      Busana (Ageman)

Anggenipun ngadi busana kajumbuhan kaliyan kaperluwan, wonten ing adicara menapa ingkang badhe dipunayahi.

2.      Subasita (Trapsila, Tata Krami)

Solah bawa sampun ngantos kadamel-damel, prayogi ingkang prasaja kemawon, anteng, manteb, nanging mboten kaken.

3.      Swara (Vokal, Basa Populer)

Kedaling lisan kedah cetha, sampun ngantos kesesa, nanging ugi sampun ngantos nglentreh sanget.

4.      Basa tuwin Sastra

Basa ingkang kaginakaken kedah miturut tuntunaning sastra ingkang leres.

• Rantamaning Sesorah :

1.      Salam Pambuka

2.      Purwaka, yaiku ucapan syukur marang Gusti saha atur panuwun marang para rawuh

3.      Isi/ wos sesorah, yaiku uderaning bab ingkang dipunwedharaken

4.      Dudutan (simpulan), yaiku inti sarining wedharan

5.       Wasana, yaiku atur panuwun saha atur nyuwun pangaksami anggenipun nindakaken jejibahan.

• Metode-Metode Sesorah :

1. Metode Apalan, sesorah cara menika saderengipun sampun damel seratan sesorah lajeng dipunapalaken.

2. Metode Naskah utawi Teks, cara menika juru pamedhar sabda saestu bekta naskah, teks, utawi catetan sesorah.

3. Metode Dadakan utawi Impromtu, cara menika pidhato boten kanyana-nyana saderengipun menawi badhe dipunaturi sesorah utawi ndadak ing adicara menika lajeng dipunaturi sesorah.

4. Metode Eksemporan, yaiku cara juru pamedhar sabda ngasta utawi damel catethan alit kanggo sesorah.

• Jinis-Jinising Sesorah :

1.      Sesorah miturut ancase (tujuan) :

ü  Menehi informasi / pemanggih.

ü  Menehi panglipur.

ü  Kanggo pangajak-ajak.

2.      Miturut kahanane sesorah :

ü  Sesorah resmi.

ü  Sesorah setengah resmi.

ü  Sesorah ora resmi.

3.      Miturut pendekatan isine sesorah :

ü    Sesorah intelektual.

ü    Sesorah moral.

• Contoh Sesorah :

Assalamu'alaikum Wr. Wb.

Bapak kepala sekolah ingkang satuhu kula bekteni, Bapak saha Ibu dwija  ingkang satuhu kinurmatan, para rawuh ingkang sinuba ing karaharjan dalasan rayi kula kelas X saha XI saha kanca-kanca kelas XII ingkang kula tresnani.

 Puji syukur tansah konjuk wonten ngarsanipun dhumateng Allah SWT ingkang sampun paring kanugrahan ingkang tanpa kendhat awujud kasarasan, rahmat saha hidayah dhumateng kula panjenengan sami. Pramila awit saking sih nugrahaning Gusti ingkang hakarya jagat kula panjenengan sami ing wekdal menika saged kempal saperlu hangrawuhi adicara ing kalenggahan menika kanthi wilujeng nir ing sambekala.

Kadang kula kelas X saha XI ingkang kula tresnani, sekedhap malih kula sakanca kelas XII badhe nilaraken pawiyatan ing SMA Buana menika. Awit saking menika mbok bilih sadangunipun kula sesrawungan kaliyan sedherek sedaya wonten kalepatan saha kekhilafan ingkang sengaja punapa boten kasengaja kula minangka sulihipun kanca-kanca nyuwun agunging pangapunten.

Wonten mriki kula paring pepeling dhateng rayi-rayi kula sedaya mugi – mugi sasampunipun kula sakanca medal saking pawiyatan mriki rayi kula kelas X saha XI  sageda dados siswa – siswi  ingkang tansah mbangun turut dhumateng Bapak saha Ibu dwija saha dados siswa ingkang pinter saha kreatif.

Rayi kula kelas X saha XI ingkang kula tresnani, kula tansah dedonga saha memuji mugi – mugi rayi kula ingkang taksih wonten ing pawiyatan mriki tansah pinaringan pangayomanipun Allah SWT saha semanten ugi kula nyuwun donga saha pangestu dhumateng para rayi kula mugi – mugi kula saged nglajengaken wonten ing pawiyatan ingkang langkung inggil, wondene ingkang badhe nyambut damel sageda tumunten pikantuk padamelan ingkang trep kaliyan ngelmi saha kesagedanipun piyambak – piyambak.

Wasana, semanten atur kula minangka sesulih saking kanca-kanca kelas XII sedaya,  mbok bilih anggen kula matur wonten kalepatan, kula tansah nyuwun samodra pangaksami.

Wassalammu'allaikum Wr. Wb.

Sumber : LKS Basa Jawa Kelas XI SMA/MA/SMK

{http://irwantoadi926.blogspot.co.id/2016/01/pangerten-sesorah-metode-jinis-jinis.html?m=1}

{http://ohbaru.blogspot.co.id/2014/07/kumpulancontohsesorahpidatobahasajawa.html?m=1}